FRAGA DE CATASÓS

Declarada Monumento Natural, un dos sete existentes en Galicia, esta fraga de 45.185 metros cadrados de superficie, conta con excepcionais exemplares de carballos e castiñeiros, algúns destes últimos acadan os 30 metros de altura e 5 metros e medio de  perímetro, estando considerados como os de maior taxa de medranza anual de Europa.

Era propiedade da familia Quiroga, habitantes do pazo situado no lugar do mesmo nome, a poucos metros da fraga, por iso tamén é coñecida como  Fraga de Quiroga, Souto de Quiroga ou Carballeira de Quiroga.

No ano 1864 un dos descendentes desta familia casa con Emilia Pardo Bazán, quen mais tarde escribía algúns capítulos da súa obra “Los Pazos de Ulloa” neste pazo.

A mediados do século XX a FAO (Organización das Nacións Unidas para Agricultura e Alimentación) reclamou a protección desta fraga. No ano 1998 pasou a ser propiedade da Consellería de Agricultura e Medio Ambiente, sendo declarada Monumento Natural no ano 2000.

Esta fraga pode desfrutarse por un sendeiro circular sinalizado, de sinxelo percorrido, equipado con paneis interpretativos, e de 1 hora de duración estimada.

 Como chegar:

Dende Lalín coller a N-525 en dirección a Ourense, percorremos dende a rotonda  2.5 quilómetros e atopamos a Fraga, á esquerda.

Coordenadas: 42°38'12.9"N 8°05'37.0"W

 

fraga catasos
Mapa