ALTAR DO SOL E MÁMOAS DE ALPERIZ

Segundo o catálogo arqueolóxico do concello de Lalín do ano 1999, estas mámoas formaban parte dun conxunto de sete, coñecido como Mámoas da Cruz, das que na actualidade só se conservan tres. Que se corresponderían cos números 1, 6 e 7 do mapa.

Existen duas mámoas máis situadas na coñecida como Zarra do Canal que tamén se conservan.

Todas elas pertencen ao Neolítico e foron saqueadas, ao igual que a maioría das existentes en Galicia, tras a licenza concedida por Felipe III a Vazquez de Orxas en 1609, para recuperar os posibles tesouros existentes no seu interior para a Facenda Real, aínda que moitas delas foron saqueadas polos campesiños movidos pola “febre do ouro” creada.

O número 1 correspóndese coa Mámoa da Cruz, nela pódese apreciar perfectamente o túmulo de terra e albiscar os 5 esteos que sobresaen da cámara e a pedra de cubrición movida. Nesta hai un oco no que se cre que en algún momento poido haber chantada unha cruz, de ahí o seu nome. Foi recoñecida polo departamento de Cultura da Xunta de Galicia en 2011.

O número 6 correspóndese cun recinto pechado formado por 7 esteos e presidido por unha gran pedra con dous rebaixes en forma de círculo orientado cara o nacente, que os veciños coñecen co nome de Altar do Sol. Foi declarado BIC como monumento histórico artístico en 1974.

O número 7 correspóndese coa Mámoa do Cruce, chamada así por estar xusto no cruce de entrada a Alperiz, a beira da estrada. Non se pode apreciar con claridade o número de esteos que aínda se conservan. Un deles sobresae 1.5 metros de alto e nel pódese ver un gravado con motivos serpentiformes, orientado cara o leste.

Coordenadas Mámoa da Cruz: 42º42'55.4''N 8º01'58.7''W

Coordenadas Mámoa do Cruce:42º42'51.5''N 8º01'59.2''W

Coordenadas Altar do Sol: 42º42'52.5''N 8º01'56.6''W

Como chegar:

Dende Lalín coller a N-640 en dirección Agolada. Dende a rotonda inferior do centro comercial Deza, percorrer 5,5 quilómetros. Coller o desvío, á dereita, cara a Carballeda, pola estrada EP-6010. Despois de percorrer por esta estrada 4.5 quilómetros ata atopar, á dereita, o desvío cara Alperiz, xusto no cruce atópase unha destas mámoas.

 

altar do sol
Mapa