Arquitectura Civil

O pasado e o futuro converxen en Lalín. Pontes medievais de pedra coma a Ponte Taboada ou a Ponte dos Cabalos conviven coa acristalada arquitectura de vangarda do Castro Tecnolóxico. Na vangarda científica estivo tamén o que foi o primeiro observatorio astronómico de Galicia, construído por Don Ramón Mª Aller en 1924, e no que, a día de hoxe, despois do seu acondicionamento, se levan a cabo visitas e actividades de observación do firmamento.

Como exemplo de arquitectura industrial, pervive o edificio da fábrica de papel de Rodís, fundada arredor do ano 1850, hoxe vivenda familiar.

Os pazos, as construcións mais características da nobreza fidalga de Galicia contan no municipio con mais de trinta exemplares. Algúns, privados dos seus moradores, resisten a duras penas o paso do tempo, mantendo a súa dignidade, mirando con esperanza ao Pazo de Liñares que estivo a punto de converterse en sombra de si mesmo e que agora, renacido coma unha ave fénix, móstrase aos visitantes en todo o seu esplendor. Outros conservan a súa función de vivenda, ou convertéronse en establecementos rurais que acollen co seu señorío  aos seus privilexiados hóspedes.

E se o que se quere é desfrutar da arquitectura popular, basta con dar un paseo polo rural para admirar construcións funcionais coma os muíños de auga, hórreos, lavadoiros, ou os balados de pedra que son a alma da nosa paisaxe.

Antiga fábrica de papel de Rodís

Este edificio situado na parroquia de Rodís é unha grande nave industrial construída en cadeirado de pedra, con teito a dúas augas, e con medio cento de ventás . O conxunto está rodeado por outros edificios máis pequenos. Atópase sobre unha das ribeiras do río Barbán, afluente do Arnego.

Crese que na súa construción puido participar Juan Cendón Carballal, quen xa estivera presente na edificación de dúas fábricas, Lavandeira e Bouteiro, na zona de O Carballiño. Utilizando a información da obra, “Historia del papel en España” de Gonzalo Gayoso Carreira, pódese deducir que a fábrica comezou a súa produción de papel cara a 1850, pero a falta de documentación da época fai que a historia deste edificio sexa practicamente descoñecida.

Probablemente todo o laborioso proceso de produción de papel fose feito por mulleres, dende a preparación dos trapos, materia prima fundamental por aquel entón para a fabricación do papel, ata o secado das follas. O período de actividade foi mais ben curto, duns 50 anos, xa que en 1880 iniciouse en España a elaboración de papel a partires de pasta de madeira e isto supuxo a fin da maioría das fábricas tradicionais existentes.

Na actualidade, unha das antigas salas de secado está rehabitlitada como vivenda, sendo pois unha propiedade privada.

Nas súas inmediacións pode observarse un exemplar bicentenario de árbore do incenso (Juniperus thurifera) que se considera único en Galicia.

Coordenadas
42.7512222, -008.0881667
Imagen Antiga fábrica de papel de Rodís