Arquitectura Civil

O pasado e o futuro converxen en Lalín. Pontes medievais de pedra coma a Ponte Taboada ou a Ponte dos Cabalos conviven coa acristalada arquitectura de vangarda do Castro Tecnolóxico. Na vangarda científica estivo tamén o que foi o primeiro observatorio astronómico de Galicia, construído por Don Ramón Mª Aller en 1924, e no que, a día de hoxe, despois do seu acondicionamento, se levan a cabo visitas e actividades de observación do firmamento.

Como exemplo de arquitectura industrial, pervive o edificio da fábrica de papel de Rodís, fundada arredor do ano 1850, hoxe vivenda familiar.

Os pazos, as construcións mais características da nobreza fidalga de Galicia contan no municipio con mais de trinta exemplares. Algúns, privados dos seus moradores, resisten a duras penas o paso do tempo, mantendo a súa dignidade, mirando con esperanza ao Pazo de Liñares que estivo a punto de converterse en sombra de si mesmo e que agora, renacido coma unha ave fénix, móstrase aos visitantes en todo o seu esplendor. Outros conservan a súa función de vivenda, ou convertéronse en establecementos rurais que acollen co seu señorío  aos seus privilexiados hóspedes.

E se o que se quere é desfrutar da arquitectura popular, basta con dar un paseo polo rural para admirar construcións funcionais coma os muíños de auga, hórreos, lavadoiros, ou os balados de pedra que son a alma da nosa paisaxe.

Observatorio astronómico

Está situado no que foi xardín da casa do fillo ilustre de Lalín, D. Ramón María Aller Ulloa convertida dende o ano 1986 no museo municipal que leva o seu nome.

D. Ramón empezou facendo observacións dende a galería da casa, (primeiro observatorio). No ano 1911 xa tiña labrado un nome no eido da astronomía e foi convidado polo empresario e mecenas Luis de Ocharan Mazas a trasladarse, sobre todo no verán, ó seu observatorio de Castro Urdiales. Estas estadías que tiveron lugar entre 1911 e 1920, permitíronlle traballar con instrumentos de alta calidade e motivaron a D. Ramón a construír o seu propio observatorio en Lalín. Así, entre 1912 e 1917 construíu dúas casetas de madeira no xardín (segundo observatorio) para albergar o seu instrumental e levar a cabo as súas observacións, investigacións e estudos. No 1923, e con vistas a instalar un telescopio refractor Steinhel de 120 mm, fixo os planos para unha nova construción que contase con unha cúpula, necesaria para acoller este instrumento. O novo observatorio foi rematado no ano 1924, converténdose así no primeiro de Galicia.

No novo emprazamento continúa unha produtiva actividade investigadora ata que, en 1943, os instrumentos son trasladados ó Observatorio da Universidade de Santiago de Compostela (do cal é nomeado director).

A edificación é restaurada no 2010, coidando de manter o mesmo revestimento interno de madeira da cúpula primitiva pero dotándoa dun sistema de apertura e xiro automáticos. Equípase con un moderno telescopio Planewave de 0,51m de apertura. Hoxe en día acolle actividades periódicas de difusión e educación no eido da astronomía.

Axenda
Luns a venres: 10:00 - 14:00, 17:00 - 19:00
Sábados e domingos: Pechado
Enderezo
Rúa Ramón Aller, 9 - 36500 Lalín
Teléfono
986 784 004
Correo electrónico
museo@lalin.gal
Coordenadas
42.6611389, -008.1133056
Imagen Observatorio astronómico