Arquitectura Civil

O pasado e o futuro converxen en Lalín. Pontes medievais de pedra coma a Ponte Taboada ou a Ponte dos Cabalos conviven coa acristalada arquitectura de vangarda do Castro Tecnolóxico. Na vangarda científica estivo tamén o que foi o primeiro observatorio astronómico de Galicia, construído por Don Ramón Mª Aller en 1924, e no que, a día de hoxe, despois do seu acondicionamento, se levan a cabo visitas e actividades de observación do firmamento.

Como exemplo de arquitectura industrial, pervive o edificio da fábrica de papel de Rodís, fundada arredor do ano 1850, hoxe vivenda familiar.

Os pazos, as construcións mais características da nobreza fidalga de Galicia contan no municipio con mais de trinta exemplares. Algúns, privados dos seus moradores, resisten a duras penas o paso do tempo, mantendo a súa dignidade, mirando con esperanza ao Pazo de Liñares que estivo a punto de converterse en sombra de si mesmo e que agora, renacido coma unha ave fénix, móstrase aos visitantes en todo o seu esplendor. Outros conservan a súa función de vivenda, ou convertéronse en establecementos rurais que acollen co seu señorío  aos seus privilexiados hóspedes.

E se o que se quere é desfrutar da arquitectura popular, basta con dar un paseo polo rural para admirar construcións funcionais coma os muíños de auga, hórreos, lavadoiros, ou os balados de pedra que son a alma da nosa paisaxe.

Pazo de Anzuxao

Foi fundado no século XVI, aínda que o edificio actual é do século XVIII. Conta cos elementos típicos que definen estas emblemáticas construcións galegas: capela, pombal, hórreo e escudo familiar o cal non garda ningunha relación con este pazo, xa que foi traído do pazo de A Calzada, en Bendoiro, ao seren ambos mercados pola familia dos actuais propietarios.

A construción con planta en escuadra está feita en materiais propios da zona, ten escaleira de cantería que culmina nun patín cuberto que se une a un fermoso corredor - solaina que ocupa mais da metade da fachada, todo con chan de cantería. A este belo conxunto pétreo póñenlle a guinda uns coidados xardíns polos que o visitante pode pasear libremente.

Dende 1970, nos seus arredores encóntranse asentadas as instalacións de Lácteos Anzuxao, unha fábrica tradicional de queixos galegos á que lle presta o seu nome e na que, previa reserva, se pode ver parte do proceso de fabricación.

Axenda
Lunes a viernes: 08:00 a 14:00 16:00 a 20:00
sábados, domingos e festivos: 10:00 a 14:00
Visitas
consultar por teléfono horarios
Enderezo
Madriñán, 2 - 36512 Madriñán (Lalín)
Teléfono
986 794 135
Correo electrónico
info@lacteosanzuxao.com
Sitio web
Coordenadas
42.7107778, -008.1425000
Imagen Pazo de Anzuxao